Kamitora Ramen 神虎拉麵:拉麵界新寵

22:29 , , 0 Comments




Kamitora Ramen神虎拉麵
灣仔廈門街23號
Japanese/Ramen
必食推介：煎餃子、神虎拉麵、赤虎拉麵
7.5/10 plates emptied!
                                         [Written by Gobay]

 「嘿，老闆！」
「哦，啱收工？」
「今日未食飯就諗起你尐拉麵。」
「好，即到！」

唔知大家有無睇過《深夜食堂》，神虎拉麵的鋪面好似深夜食堂，食客睇到廚房，只有”L字形”的Bar檯位，地方好細，但午飯時間要排隊15-30分鐘，人多仲要等得耐。總感覺在香港食拉麵同在日本小鋪食有差距，其實唔一定係因為D麺或湯底，好多時係因為企在你面前整俾你食果位師傅。在日本，師傅會親自問你，食之前要咩，食完感覺點，會教埋你點食，小鋪根本係一腳踢唔需要服務員落單，亦唔需要劃紙仔，可惜在香港文化底下，呢類型的拉麺館真係一間都無。

入正題，評點下在拉麵館必點的食物，豚骨味、醬油味、味噌味和鹽味係日本傳統拉麵的四種口味，呢度係豚骨味拉麵做主打：
                                               神虎拉麵 HKD$83


基本配料有叉燒、怪味筍、紫菜、爽口木耳。渾濁的黃白湯面浮有好多豬背脂，白色一粒粒，喜愛清淡的朋友可能會唔中意，但呢個其實係足料的象徵，在日本係好普遍的做法，因為會增加入口的厚重和油滑感。因此湯頭豚肉味很出，但相對名店豚王而言都仲係比較清，可能系味噌的關係，唔會太油膩，亦比一風堂的勝出好多。Carly呢碗選擇了幼麺軟身，麵條上唔係掛左太多的湯汁，但入口果下都頗為豐富濕潤，湯頭的豚肉味亦都完整地包住D麺。麺上的時候有一小撮特製辣醬，有種清新去油膩的感覺。叉燒相對一般，但怪味筍和木耳真係好爽口，味道口感都不俗!

                                赤虎拉麵 HKD$78 + 糖心蛋 HKD$10

餐牌上面介紹話係用在大阪分店好受歡迎的特製辣醬煮成的，所揀選的配搭係粗麵硬身，外加糖心蛋一隻。湯底爽口，因為本身辣醬就開胃，更加化解左濃郁的豚肉湯的油滯感。辣醬有種獨特的咸鮮味，直衝味蕾，辣度夠但帶俾舌底的刺熱感並唔強烈，所以食起身舒服，但整體偏咸左少少。糖心蛋一流，放係湯匙已經感受到果種綿軟，唔使咬開你已經可以確定它一定流心，非常好味。粗麵韌度夠，但麺本身的味道完全被辣味覆蓋，有點美中不足，但亦都係正常的事。                       
                                              黑虎拉麵 HKD$78

特別元素是黑蒜油，好食過一風堂現時推出緊的限定的黑蒜粗拉麵，但蒜味就掩蓋住本身的豚肉味，當然食起來口感更清爽一尐。
                                                煎餃子   HKD$38
                                            

呢個純屬驚喜——好味的煎餃子！餃皮係爽的，無粉粉水水的感覺，餡料加左韭菜，和豬肉係絕配，再點上酸酸甜甜的醬油，味道真係值得推介。

另外檯頭配有高菜、紅薑和辣豆芽，算係香港拉麵館相對少有的搭配，幾開胃。




 
 
 
 

Gobay food knowledge corner: 高菜即係芥菜的一種，好適合用來醃製，口感類似冬菜。日本紅薑并唔係雲南的野生薑品種，而是用梅子汁醃製的嫩薑，酸辣甜爽，十分鮮味亦營養豐富。